Club de lectura de 3º de Primaria

Hoxe botou a andar o club de lectura de 3º de Primaria, que se reunirá as tardes do xoves na biblioteca do colexio.

Os obxectivos están claros: mellorar o hábito lector, descubrir novos libros e autores/as e sobre todo... pasalo ben!! 😉

Club de lectura de familias

O pasado 2 de decembro tivemos na biblioteca a segunda xuntanza do Club de Lectura de Familias, na que comentamos o libro que estivemos a ler ao longo deste mes: Senlleiras, de Antía Yáñez. 

Ademais, tamén houbo tempo para merendar e escoller a nosa vindeira lectura conxunta, que será Flores de ferro, de María Rei Vilas. 

Se che apetece unirte ao club e participar na próxima xuntanza, estás a tempo! Escribe un e-mail ao correo do centro para anotarte. 

A Revolta das Letras

Mañá, 24 de outubro, conmemórase o Día das Bibliotecas, e que mellor xeito de celebralo ca xuntándonos na biblio para inaugurar un novo curso do club de lectura de secundaria. 

Durante o segundo recreo reunímonos todos os membros do club para recoller as lecturas que compartiremos durante este trimestre: Verdade, Santoamaro e A miña planta de laranxa lima. 

Comeza a Revolta das Letras!!

Club de lectura de familias

O pasado martes, 7 de outubro, celebramos a primeira xuntanza do Club de lectura para familias do CPI As Revoltas. 

Nesta reunión explicamos o funcionamento do club: reunirémonos aproximadamente cada dous meses para comentar as nosas impresións arredor dun libro escollido previamente. 

A nosa primeira lectura compartida será a novela Senlleiras, de Antía Yáñez e o vindeiro encontro terá lugar a comezos de decembro. 

Agradecemos moito ás primeiras nais que se animaron a participar (tamén ás que non puideron achegarse á reunión) e convidamos a todas as familias a formar parte deste club de lectura. 

A Revolta das Letras

Xa estamos de volta!!

Como cada comezo de curso, ponse en marcha A Revolta das Letras, o club de lectura do alumnado de secundaria. Se che gusta ler e compartir aventuras lecturas, este é o teu club. 

Ademais, este ano virá cargadiño de sorpresas... 

Bule a anotarte!

Nadal na biblio!! ✨🎄

O Nadal está ás portas e estas últimas semanas realizamos moitas actividades para celebralo. Contámosvos aquí algunhas das cousiñas que fixemos. 

📚 Festa de Nadal do club de lectura 

O xoves 19 celebrouse na biblio unha festiña do club de lectura, para celebrarmos as lecturas que compartimos durante este trimestre e as que están por vir. Vimos unha curtametraxe, o alumnado de 4º leunos un conto de Nadal e, por suposto, non faltou a merendola. Os reis, que andaban ese día polo centro, trouxéronlle a cada membro do club un chaveiro e un marcapáxinas. 

🎵 Cantos de Reis 

O mércores 18 os nenos e as nenas de 6º de Infantil foron cantar os Reis por todo o cole. Que ben o pasamos con estes/as artistas!! 😊

🎤 Regueifa de Nadal

O alumnado de 2º ESO deséxanos unhas felices festas a ritmo de regueifa. Podedes vela neste vídeo: 

📗 Contos de Nadal

O alumnado de 1º ESO gravou polo Nadal dous episodios especiais do seu podcast Contos Revoltos. Non vos perdades os seus relatos, queridos contistas!!

📚 Máis contos

E se quedades con ganas de máis historias de Nadal, na biblio temos unha exposición de libros moi axeitados para estas datas. 

🎄 Decoración da biblio

Súper Pepiña vestiuse para celebrar o Nadal e o voluntariado construíu unha súper árbore de libros na entrada da biblio. 

BO NADAL E FELIZ ANO NOVO!!

Volve a Revolta das Letras

O pasado xoves, 10 de outubro, inauguramos na biblioteca un novo curso do club de lectura A Revolta das Letras. Neste encontro, démoslle a benvida aos/ás novos/as participantes, informamos sobre a organización e funcionamento do club e, por suposto, tamén falamos de libros. Ao longo deste trimestre, leremos as seguintes obras: 

- O grupo de 1º ESO lerá Mentira, de Care Santos

- O grupo de 2º ESO lerá Que me pare o corazón se te esquezo, de Andrea Maceiras

- Por último, o grupo de 3º e 4º ESO lerá Poder non é querer, de Noela Rivas. 

No seguinte enlace podedes consultar o calendario de reunións previstas para este trimestre. As datas poden variar atendendo ao que se acorde coas coordinadoras do club. 

CLUB DE LECTURA - CALENDARIO DE REUNIÓNS

Volve a Revolta das Letras!! :)

Club de lectura

Gústache ler? Queres vivir emocionantes aventuras lectoras? Únete ao club de lectura de secundaria! Leremos un libro cada trimestre e reunirémonos un recreo á semana. Infórmate e apúntate na biblioteca antes do 23 de setembro. 

Xa é Nadal na biblio!

O Nadal xa chegou á Biblioteca das Revoltas! 🎄🎅 Súper Pepiña puxo o traxe de luces e convidou o seu amigo Crebanoces para celebrar xuntos as festas. 

Van chegar as vacacións e Súper Pepiña está feliz

Un novo habitante da biblio - Grazas a Pablo por traelo!

Súper Pepiña e o Crebanoces fixeron unha selección de libros para desfrutar do Nadal. Podedes atopalos na entrada da biblio. 

Cantos de Reis do alumnado de Infantil

Ao longo da mañá do martes, 19 de decembro, o alumnado de 5º de Infantil agasallounos cantando os Reis polas clases de Primaria e Secundaria. Que ben o fixeron e que ben o pasamos todos escoitándoos! 💖

Merenda de Nadal do Club de Lectura

No primeiro recreo do mércores, 20 de decembro, tivemos a última xuntanza deste ano da Revolta das Letras, o club de lectura de secundaria. Fixemos unha pequena festiña de despedida e o alumnado recibiu un pequeno agasallo. A Revolta continúa no 2024. 

A Revolta das Letras

O pasado xoves, 19 de outubro, inauguramos un novo curso de A Revolta das Letras, o club de lectura de secundaria, do que forman parte arredor de corenta participantes de todos os grupos da ESO. 

Neste primeiro encontro falamos sobre o funcionamento do club (grupos, reunións, etc.) e coñecemos as primeiras lecturas conxuntas que realizaremos este ano: Mentira e Verdade, de Care Santos e Senlleiras, de Antía Yáñez.

Aí queda para o recordo unha fotiño deste feliz recreo. A revolta lectora está en marcha! 

Inauguración do Club de Lectura - Súper Pepiña non podía faltar :)

8M - Día Internacional da Muller

Para conmemorar este día recibimos a visita de Inés e María, dúas mariscadoras do Río Anllóns, que nos viñeron contar como é o seu traballo, as condicións, os utensilios que usan, cantos kg de berberechos poden coller ao día, etc. 

Ao día seguinte, o alumnado de infantil e primaria, visitou a depuradora, onde Inés nos explicou todo o proceso que pasa o berberecho para poder ser vendido. 

No club de lectura A Revolta das Letras celebramos o 8 de marzo lendo e reflexionando sobre o significado e a importancia deste día. Nunha asamblea aberta a todo o alumnado que quixese participar fixemos unha lectura conxunta de textos feministas de grandes autoras, coma Rosalía de Castro, que xa no século XIX berrou "Eu son libre!" ou Xohana Torres, que nos agasallou o potente verso "Eu tamén navegar". Compartimos as nosas lecturas no seguinte enlace: 

EU TAMÉN NAVEGAR - POEMAS PARA CELEBRARMOS O 8 DE MARZO

Celebrando A Revolta das Letras

Hoxe tivo lugar a última xuntanza do ano da Revolta das Letras, o noso club de lectura. Fixemos unha pequena festiña na biblio, para celebrar as nosas primeiras lecturas e despedirnos ata despois do Nadal. 

Contamos nesta xuntanza coa presenza de Rosalía Fernández Rial. Vémola todos os días como profe e compañeira, pero hoxe tivemos a inmensa sorte de que nos mostrase o seu traballo como escritora, recitándonos algún poema do seu libro Desnortada. 

Tamén houbo tempo para unha pequena paparota! 😃

Cada membro do club levou un pequeno agasallo. 🎁

Vémonos (e lemos) á volta das vacacións. A Revolta das Letras continúa no 2023!!

Comeza A Revolta das Letras!

Hoxe botou a andar A Revolta das Letras, o club de lectura de secundaria no que participan 35 alumnas/os e as profesoras de linguas. As nosas primeiras lecturas serán Mentira, de Care Santos (para 1º e 2º ESO) e Que me pare o corazón se te esquezo, de Andrea Maceiras (para 3º e 4º). Vémonos o vindeiro xoves no 2º recreo. A Revolta xa está en marcha!!