O blog de Súper Pepiña

luns, 27 de abril de 2026

Encontro con Érica Esmorís

O pasado venres 24 de abril, no marco da celebración do Mes do Libro, visitou o noso cole Érica Esmorís, unha das escritoras máis queridas do noso alumnado.

O encontro tivo lugar no salón de actos e a el acudiron os cursos de 3º, 5º e 6º de Primaria e 1º de ESO, que previamente leran e traballaran nas aulas os seus libros Erin e o lobo (Premio Merlín) e Esta é a miña historia e terás que crela (Premio Raíña Lupa).

O alumnado de 6º conduciu o acto e Érica Esmorís falounos sobre temas tan interesantes coma a literatura e o oficio de escribir, sobre as súas historias e personaxes preferidas, sobre a natureza... e tamén respondeu todas as nosas dúbidas e curiosidades sobre os seus libros.

A continuación, as alumnas do club de lectura de 1º de ESO fixéronlle unha entrevista para Ondas Revoltas. Podedes escoitala premendo na imaxe.

Moitísimas grazas, Érica, por visitar o CPI As Revoltas e por este encontro tan proveitoso para nós!!

Entrevista a Érica Esmorís para Ondas Revoltas

Deixámosvos algunha foto do encontro:

E tamén vos convidamos a ver as nosas ilustracións de Erin e o lobo. Premendo na imaxe descubrirás o que nós atopamos ao abrir as tapas do libro.

Premio Mil Primaveras para Revolta Galega

O noso colexio vén de recibir un importante recoñecemento ao ser galardoado co Premio Mil Primaveras polo proxecto denominado "Revolta Galega".

Este premio pon en valor o compromiso da nosa comunidade educativa coa promoción, dinamización e uso da lingua galega.

O proxecto Revolta Galega naceu coa finalidade de fomentar o orgullo pola nosa lingua e cultura entre o alumnado, a través de diferentes actividades levadas a cabo ao longo destes anos.

Queremos destacar o esforzo e a implicación de todo o profesorado e alumnado nesta iniciativa. Romarías, encontros, entrevistas, podcast...., moitas actividades que só son posibles grazas ao traballo en equipo.

"O xurado considerou un aspecto destacable deste proxecto que é un modelo integral de dinamización para todo o centro e en diferentes ámbitos (...). Son especialmente interesantes as accións que serven para dar a coñecer referentes galegofalantes de diferentes ámbitos (ciencia, música, literatura...), onde o propio alumnado participa activamente facendo entrevistas."

Moitas grazas a toda a comunidade educativa do CPI As Revoltas por facer posible este logro!

Preme na imaxe para acceder á web dos Primeios Mil Primaveras e ao proxecto Revolta Galega.

venres, 24 de abril de 2026

Fotografando os nosos bosques

No seguinte vídeo presentamos as máis de 60 fotografías que enviastes ao certame Fotografando os nosos bosques proposto para celebrar no colexio o Día das Artes Galegas.

A través das vosas fotos percorremos toda Cabana, desde o Banco dos Picotiños ata Borneiro, pasando polo Rego dos Muíños, o monte Castelo, a devesa de Canduas, o mirador de monte Perrol... E tamén fomos máis lonxe, a outros bosques galegos coma as Fragas do Eume, o monte Xalo (Carral), o monte de San Roque (Viveiro)... Unha viaxe marabillosa por toda a xeografía galega!

Moitas grazas por participar e compartir as vosas fotografías!