O pasado venres 24 de abril, no marco da celebración do Mes do Libro, visitou o noso cole Érica Esmorís, unha das escritoras máis queridas do noso alumnado.
O encontro tivo lugar no salón de actos e a el acudiron os cursos de 3º, 5º e 6º de Primaria e 1º de ESO, que previamente leran e traballaran nas aulas os seus libros Erin e o lobo (Premio Merlín) e Esta é a miña historia e terás que crela (Premio Raíña Lupa).
O alumnado de 6º conduciu o acto e Érica Esmorís falounos sobre temas tan interesantes coma a literatura e o oficio de escribir, sobre as súas historias e personaxes preferidas, sobre a natureza... e tamén respondeu todas as nosas dúbidas e curiosidades sobre os seus libros.
A continuación, as alumnas do club de lectura de 1º de ESO fixéronlle unha entrevista para Ondas Revoltas. Podedes escoitala premendo na imaxe.
Moitísimas grazas, Érica, por visitar o CPI As Revoltas e por este encontro tan proveitoso para nós!!
No noso colexio quixemos conmemorar o 8 de marzo, Día Internacional da Muller, cunha actividade sinxela pero chea de significado: un photocall no que participou a comunidade educativa do CPI As Revoltas.
Para a ocasión, preparamos un espazo especial coa imaxe de Rossie, a Remachadora, a muller do icónico cartel que se converteu en símbolo da fortaleza da muller en EE.UU., cun xesto que representa a loita, a resistencia e o compromiso pola igualdade. Ao longo da xornada, todas as clases foron pasando polo photocall para facer fotos, converténdose así en protagonistas dunha mensaxe común.
Dende o colexio, seguimos traballando día a día para fomentar a igualdade de oportunidades e visibilizar o papel fundamental das mulleres na nosa sociedade. Porque a igualdade constrúese entre todas e todos, cada día.
A continuación deixamos un vídeo con todas as fotos realizadas. A música que acompaña ás imaxes son cancións de Sés, artista galega que nos acompañou a semana pasada no colexio para conmemorar este día.
Por outra banda, o alumnado de 4º de Primaria tamén gravou un programa especial para Ondas Revoltas, falando sobre Sés, o 8M, os dereitos das mulleres e o seu importante papel na sociedade galega. Podedes escoitalo premendo na fotografía:
O pasado 13 de febreiro celebrouse o Día Mundial da Radio e a segunda semana de marzo foi a Semana da Prensa. Presentamos nesta entrada algunha das actividades que se realizaron para conmemorar estas xornadas vinculadas cos medios de comunicación.
Por unha banda, o alumnado de 4º de primaria gravou un programa especial para Ondas Revoltas sobre a radio e a Intelixencia Artificial, uníndose á proposta de Ponte nas Ondas. Podedes escoitalo premendo na fotografía:
Por outra, o alumnado de 2º ESO deseñou e redactou portadas de xornais e o alumnado de 3º ESO redactou as boas noticias que lles gustaría ler este ano.
Hoxe, 3 de marzo de 2026, e para conmemorar o vindeiro 8 de Marzo, Día Internacional da Muller, a visita da cantante galega Sés ao noso colexio converteuse nunha experiencia inesquecible para todos e todas nós. Foi unha xornada chea de emoción e, sobre todo, moita música.
O alumnado de secundaria tivo a oportunidade de entrevistar a Sés na nosa radio "Ondas Revoltas". Durante a conversa, puideron achegarse á súa traxectoria. Sen dúbida, foi un momento moi enriquecedor tanto a nivel académico como persoal para os nosos rapaces e rapazas. Se premes na fotografía poderás acceder a dita entrevista.
Entrevista a Sés en Ondas Revoltas
Logo, no salón de actos, tiñámoslle preparada unha sorpresa moi especial. Proxectamos un vídeo no que participaba todo o alumnado do centro, o cal recollía o traballo previo realizado para preparar a súa visita. O vídeo incluía, ademais, unha versión da canción Labregha Berghantiñana, que emocionou á artista. Este vídeo é un exemplo da implicación e do espírito colaborativo do noso alumnado.
Como peche desta experiencia, o alumnado de quinto de primaria, xunto coa súa mestra de inglés, elaborou un podcast en inglés no que resumían a visita.
Queremos agradecerlle a Sés a súa cercanía, a súa xenerosidade e o tempo compartido connosco. A súa visita deixa pegada en todos e todas nós. A continuación podedes ver un pequeno resumo desta visita tan especial.
O pasado 23 de febreiro festexamos o aniversario da nosa poeta máis senlleira: o Día de Rosalía de Castro. Para homenaxeala, entre todo o alumnado do cole creamos O carballo de Rosalía. Cada alumno/a escribiu versos da poeta nunha folla de carballo e decorou a folla ao seu gusto. Logo, o alumnado de Proxecto Competencial xuntou todas as follas nun gran mural. Deste xeito,vinculamos esta conmemoración co PDI do curso: os bosques. O resultado podedes velo no corredor do primeiro andar:
Por outra banda, o alumnado de 4º de Primaria tamén gravou un programa especial para Ondas Revoltas sobre Rosalía de Castro. Non volo perdades! Podedes escoitalo premendo na fotografía:
O 30 de xaneiro conmemórase o Día Escolar da Non Violencia e a Paz e no CPI As Revoltas celebrámolo plantando un bosque de sorrisos.
Cada curso encheu unha árbore de sorrisos contra a violencia, as guerras, a desigualdade, as inxustizas... Podedes ver o fermoso resultado no primeiro andar do colexio.
Para recoller este traballo, elaboramos un vídeo no que se poden ver diferentes momentos do proceso de creación do bosque. O vídeo está acompañado dun audio que foi gravado polo alumnado de 3º de Educación Primaria.
O alumnado de 4º de Primaria gravou un programa especial para conmemorar esta data. Centráronse en dúas importantes figuras: Martin Luther King e Malala. Podedes escoitalo premendo na fotografía deste fantástico equipo de xornalistas:
O 24 de xaneiro celebramos o Día Internacional da Educación, un dereito fundamental de todas as persoas. Para conmemoralo, o alumnado de 4º de Primaria gravou un novo programa para Ondas Revoltas, centrado na figura da pedagoga Maria Montessori.
Non perdades o seu programa "María Montessori, unha educadora diferente". Podedes escoitalo premendo na foto.
O alumnado de 4º de Primaria gravando "Maria Montessori, unha educadora diferente"
A piques de rematar este ano Castelao, o alumnado de 3º de Primaria agasallounos con este programa de radio sobre a vida e obra desta figura tan importante da cultura galega do século XX. Non volo perdades!!
O pasado martes, 25 de novembro, conmemorouse o Día Internacional contra a Violencia de Xénero, unha xornada para denunciar a violencia que se segue a exercer en todo o mundo contra nenas, mozas e mulleres. Contámosvos aquí algunhas das actividades que realizamos no centro durante esta xornada.
Bolboretas polo 25N
Nesta data lembramos máis ca nunca o noso dereito a voarmos sempre libres.
Así, todo o alumnado e profesorado do colexio recibiu neste día unha bolboreta violeta realizada en Polos Creativos coa impresora 3D.
As Bolboretas da Liberdade O alumnado de 4º de Primaria realizou neste día un programa especial para Ondas Revoltas. Nel cóntannos a historia das irmás Mirabal, as Bolboretas da Liberdade. Podedes escoitalo neste enlace:
O alumnado de 3º ESO visitou as aulas de infantil para lerlles contos con mensaxes positivas a prol da igualdade de xénero, a tolerancia e o respecto. Os títulos escollidos foron: Orellas de bolboreta, O libro dos porcos e Arturo e Clementina.
Onte, 20 de novembro, celebrouse o Día dos Dereitos da Infancia. Sabedes por que se conmemora este día? Descúbreo co programa que gravou o alumnado de 4º de Primaria para Ondas Revoltas. Podes escoitalo premendo na fotografía.
O alumnado de 4º de Primaria celebrou o Día das Escritoras cun programa especial para Ondas Revoltas. Nel, lembraron as autoras que escribiron ao redor de 1975 e tamén recitaron un poema contra a guerra de María do Carme Kruckenberg.
Podedes escoitar o programa premendo na fotografía.
O alumnado de 3º de Primaria estréase este curso nas Ondas Revoltas con motivo do Día das Escritoras.
Os locutores e locutoras gravaron un programa de radio baixo o lema "O bosque das escritoras", onde fan un repaso por escritoras que nos seus textos reflexaron sentimentos ou loitas polos bosques.
O pasado 17 de maio celebramos o Día das Letras Galegas, este ano dedicado á poesía popular oral, personificado nas cantareiras Adolfina e Rosa Casás (Cerceda), Eva Castiñeira (Muxía) e as Pandeireteiras de Mens (Malpica).
Esta é unha data moi especial no CPI As Revoltas e, como cada ano, festexámola por todo o alto na nosa IV Romaría das Letras. Nesta entrada contámosvos polo miúdo as diferentes actividades que realizamos no cole para celebrar a festa grande da lingua galega e para homenaxear as nosas cantareiras.
💙 IV Romaría das Letras
O 16 de maio celebramos a xa tradicional Romaría das Letras. Ao longo do día bailamos, tocamos a pandeireta, desfrutamos cos xogos populares e coa gastronomía galega... e por suposto, cantamos a nosa canción deste ano: "Viva o galego". Que ben o pasamos!
Para lembrar a felicidade deste marabilloso día deixámosvos o videoclip da canción no que se recollen algúns dos mellores momentos da xornada.
💙 Canción Viva o galego
Como xa vén sendo tradición por estas datas, sacamos unha canción para conmemorar o Día das Letras Galegas. O temazo deste ano é unha versión de "A rumboia" e está interpretado por alumnado do centro e polo noso querido Juan. Aquí tedes a letra para non deixar de cantala!
A impresora 3D de Polos Creativos botou fume toda a semana para que ninguén no cole quedase sen o seu colgante de pandeireta.
Como campamos todos/as coas nosas mini-pandeiretas! :)
💙 Obradoiros de pandeireta e baile
O alumnado do CPI As Revoltas xa está preparado para arrasar nas foliadas!
O día da romaría aprendemos uns puntos de baile galego cun gran bailador: Mario Figueira, da A.C. Donaire. Mario impartiu obradoiros de baile para o alumnado de Primaria e obradoiros de pandeireta para o alumnado de Secundaria.
Por outra banda, Aarón García, compañeiro de 4º ESO e gran pandeireteiro, impartiu obradoiros de pandeireta para o alumnado de Infantil e Primaria.
💙 Xogos populares
Na romaría houbo tamén espazo para xogar. Coordinados polo alumnado de 4º ESO, puidemos desfrutar dos nosos xogos populares: a chave, os birlos, a rá... Non faltou de nada!
💙 Galicia sabe amar
E con tanto baile e tanto xogo, precisamos repoñer forzas! Por sorte, tivemos churros feitos polas nosas marabillosas cociñeiras e tamén contamos cos deliciosos pinchos da foodtruck de Galicia sabe amar. Fame non pasamos!
💙 Fiada con Teresa dos Cucos - Programa de radio de 4º de Primaria
Teresa Reigía Pose, máis coñecida como Teresa dos Cucos, veu á nosa emisora de radio para que o alumnado de 4º de Primaria lle fixera unha entrevista. Teresa é unha cantadora, veciña de Malpica de Bergantiños, que estivo ligada ao canto desde pequena e que foi testigo de como tocaban as pandeireteiras de Mens. O que nun primeiro momento ía ser unha entrevista máis, rematou sendo unha desas "fiadas" ás que tantas veces asistiu Teresa. Podedes escoitala premendo na foto.
Fiada con Teresa dos Cucos - 4º de Primaria
💙 Elas contan e cantan - Programa de radio de 3º e 5º de Primaria
O alumnado de 3º e 5º de Primaria gravou o programa "Elas contan e cantan". As cantareiras de Mens conversan e lembran como chegaron a ter tanta sona no mundo da música tradicional galega. Podedes oílas e escoitar tamén o "maneo de Mens" premendo na foto.
Elas contan e cantan - 3º e 5º de Primaria
💙 Traballos de investigación sobre as cantareiras
Ao longo destas semanas, tamén investigamos moito sobre as homenaxeadas nas Letras Galegas deste ano e coñecemos a súa importancia e o gran valor do legado que nos deixaron. Premendo na imaxe podedes ver os traballos realizados polo alumnado de 3º de Primaria.
As cantareiras - Traballos do alumnado de 3º E.P.
💙 Proxección do documental Se canto é porque quero
Na semana das Letras Galegas, para traballar a música popular oral e as cantareiras homenaxeadas, proxectamos nas aulas de Secundaria os tres episodios do documental da Real Academia Galega: Se canto é porque quero.
Podes descargar aquí as actividades sobre o documental.
💙 Exposicións sobre a poesía popular oral
Finalmente, nos diferentes corredores do centro podedes atopar varias exposicións sobre as cantareiras e a poesía popular oral.
No primeiro andar están colgadas as exposicións enviadas pola Secretaría Xeral de Política Lingüística: Cantareiras: poesía popular oral (para Infantil e Primaria) e Canta que cadramos ben (para Secundaria).
Na entrada da biblio podedes atopar unha mostra bibliográfica para celebrar estas datas e un mural sobre a música galega realizado coa colaboración do voluntariado da biblio.
O CPI As Revoltas participou o pasado 26 de marzo no maratón radiofónico realizado en 9 puntos de Galicia e Portugal para celebrar o 30º aniversario de Ponte nas Ondas.
Acudimos, xunto con outros 13 centros escolares da Costa da Morte, á Casa da Cultura de Vimianzo, onde se desenvolveron sete horas de programación en directo. O noso alumnado participou cun programa moi especial sobre a música en Cabana. O guión foi escrito polo alumnado de 4º ESO e encargáronse da locución alumnos/as de 2º ESO. Ademais, Sofía de 1º ESO realizoulle unha entrevista ao seu avó, o músico Jesús Couto e, finalmente, Felipe e Sofía despediron o programa cunha pequena actuación musical.
No vídeo podedes ver toda a emisión da Costa da Morte. O programa do CPI As Revoltas comeza a partir do minuto 46:00.
Hoxe, martes 25 de marzo, recibimos a visita de Fina Casalderrey no CPI As Revoltas. Todos os cursos do cole desfrutamos dun marabilloso encontro cunha das nosas escritoras preferidas.
Os xornalistas de 4º de Primaria entrevistárona nas Ondas Revoltas. A escritora falou dos seus inicios no mundo das letras, das súas obras e paixóns e tamén de temas actuais. Unha extensa e interesante entrevista que podedes escoitar premendo na seguinte imaxe.
Premendo na seguinte imaxe, tamén podedes ver o traballo realizado nos días previos á visita. Moitas grazas, Fina, por visitar o noso cole!!
Hoxe, 23 de febreiro, celebramos o Día de Rosalía, para homenaxear a nosa escritora máis emblemática.
Ao longo desta semana, no cole realizamos diferentes actividades para traballar a figura de Rosalía de Castro.
💙 6º de Educación Infantil
O alumnado de 6º de Infantil fai un repaso da vida de Rosalía e recita algúns dos seus versos. Tamén fixeron unhas marabillosas caricaturas desta gran escritora. Podedes ver os seus traballos premendo na imaxe:
💙 Pódcast do alumnado de 3º de Primaria
O alumnado de 3º de Primaria cóntanos a biografía de Rosalía de Castro nun pódcast marabilloso que podedes escoitar premendo nas imaxes.
💙 "Rosalía, unha muller pioneira", polo alumnado de 4º de Primaria
O alumnado de 4º de Educación Primaria gravou na radio un podcast co título "Rosalía, unha muller pioneira", un conto sobre a vida da escritora. Ademais recitaron na aula poemas das súas obras máis coñecidas. Podedes velo no seguinte vídeo.
💙 Novo episodio do programa Contos Revoltos
Rosalía de Castro destacou como poeta, pero sabías que tamén escribiu un conto en galego? O alumnado de 1º ESO interpretan o "Conto galego" de Rosalía no último episodio do seu programa Contos Revoltos. Podes escoitalo no seguinte vídeo:
💙 Regueifando con Rosalía
A nota musical púxoa o alumnado de 2º ESO, cantándolle unha regueifa a Rosalía de Castro. Non perdas a súa fantástica actuación!
O 13 de febreiro celébrase o Día Mundial da Radio e o alumnado de 3º e 4º de Primaria colaborou coa asociación PONTE... NAS ONDAS enviando os seus programas de radio. A temática estivo centrada na radio e no cambio climático.
Preme na imaxe para acceder aos programas dos dous cursos!
Hoxe, no CPI As Revoltas cantamos todos xuntos pola Paz, porque esta comeza na escola e continúa na vida. Loitemos todos xuntos por un mundo mellor!!
Nos seguintes enlaces podes escoitar os programas realizados polo alumnado de 3º de Primaria para conmemorar o Día da Paz e o Día da Educación. Que marabilla de reporteiros e reporteiras!
O Nadal está ás portas e estas últimas semanas realizamos moitas actividades para celebralo. Contámosvos aquí algunhas das cousiñas que fixemos.
📚 Festa de Nadal do club de lectura
O xoves 19 celebrouse na biblio unha festiña do club de lectura, para celebrarmos as lecturas que compartimos durante este trimestre e as que están por vir. Vimos unha curtametraxe, o alumnado de 4º leunos un conto de Nadal e, por suposto, non faltou a merendola. Os reis, que andaban ese día polo centro, trouxéronlle a cada membro do club un chaveiro e un marcapáxinas.
🎵 Cantos de Reis
O mércores 18 os nenos e as nenas de 6º de Infantil foron cantar os Reis por todo o cole. Que ben o pasamos con estes/as artistas!! 😊
🎤 Regueifa de Nadal
O alumnado de 2º ESO deséxanos unhas felices festas a ritmo de regueifa. Podedes vela neste vídeo:
📗 Contos de Nadal
O alumnado de 1º ESO gravou polo Nadal dous episodios especiais do seu podcast Contos Revoltos. Non vos perdades os seus relatos, queridos contistas!!
📚 Máis contos
E se quedades con ganas de máis historias de Nadal, na biblio temos unha exposición de libros moi axeitados para estas datas.
🎄 Decoración da biblio
Súper Pepiña vestiuse para celebrar o Nadal e o voluntariado construíu unha súper árbore de libros na entrada da biblio.
