Visita de Ángel Carracedo

Hoxe foi un gran día para o CPI As Revoltas, pois recibimos a visita do Doutor Ángel Carracedo. Foi marabilloso poder telo tan preto e poder escoitalo. 

A súa visita comezou na biblioteca, onde o alumnado de secundaria lle fixo unha entrevista. A continuación, foron ao laboratorio a facer uns experimentos. Acto seguido, bautizamos o noso laboratorio co nome de Ángel Carracedo. 

Finalmente, baixamos ao salón de acto, onde todo o alumnado e profesorado do centro o agardaba cunha gran sorpresa. 

A continuación podedes ver un vídeo con algúns momentos da súa visita, así como o vídeo que fixemos para o seu recibimento, onde versionamos unha das súas cancións preferidas, La vida es bella. 

Tamén vos deixamos o enlace ás noticias que saíron na prensa sobre este gran día:

📰 Nenos cabaneses emocionaron a Ángel Carracedo

📰 Repasa, nestas imaxes, a emocionante visita de Ángel Carracedo a Cabana. 

Resumo da visita de Ángel Carracedo: 

"A vida é fermosa con Ángel Carracedo"

Nadal nas Revoltas

Hoxe, 19 de decembro, recibimos no noso colexio a visita tan especial de todos os anos, as Súas Maxestades de Oriente. Nesta ocasión foi o alumnado o que quixo sorprendelos a eles para agradecerlles que sempre teñan tempo de parar no CPI As Revoltas reproducindo o seu baile máis mítico en Cabana.

BO NADAL E FELIZ 2026!!

Feliz Día das Letras Galegas!

31/05/24

Actualización:

Como di o refrán: "Pasou o día, pasou a romaría" e alá vai xa a III Romaría das Letras do CPI As Revoltas. 

Para non esquecer a felicidade deste día, deixámosvos o videoclip da canción Quero o galego, no que se recollen algúns dos mellores momentos da romaría. 

Comeza a conta atrás para a IV Romaría das Letras!

16/05/2024

Nesta semana das Letras Galegas no CPI As Revoltas estamos que non paramos: música, poesía, programas de radio moi especiais, exposicións... Nesta entrada contámosvos algunhas das actividades realizadas, pero o mellor aínda está por vir! O vindeiro xoves celebraremos a III Romaría das Letras!! 

Quero o galego 💙

Como xa vén sendo tradición por estas datas, sacamos unha canción para conmemorar o Día das Letras Galegas. O novo tema, interpretado por alumnado e profesorado do centro, titúlase "Quero o galego" e é unha versión de "O galo canta". Non podemos parar de cantar e bailar! 

A rapaza de ollos incribles 😍

Este ano, as Letras Galegas están dedicadas á poeta coruñesa Luísa Villalta. O alumnado de 4º de Primaria cóntanos a traxectoria desta gran autora no marabilloso programa de radio "A rapaza de ollos incribles". Podedes escoitalo premendo na imaxe: 

Exposicións na biblioteca 📚

Ao longo deste mes de maio, realizamos na biblioteca unha exposición de grandes obras e autores/as da nosa literatura. 

No corredor da biblio, tamén podedes visitar as exposicións sobre Luísa Villalta difundidas desde a Secretaría Xeral de Política Lingüística: Luísa Villalta, tatuada na pétrea pel do mar (para Infantil e Primaria) e Viaxe polo metaverso con Luísa Villalta (para Secundaria). 

Día da Paz - Se puidese...

Queremos ver alegría, 
queremos ver amizade, 
e que sempre
e que sempre
haxa liberdade.

Hoxe, 30 de xaneiro, celebramos o Día Escolar da Non Violencia e a Paz, unha data para promover valores tan importantes coma a tolerancia, o entendemento e o respecto. 

No cole celebrámolo con música, cantando "Se puidese", unha emocionante versión da canción "No dudaría" de Antonio Flores. 

Deixámosvos tamén o enlace a un novo programa de Ondas Revoltas, elaborado polo alumnado de 4º de primaria e dedicado a lembrar a varios heroes e heroínas da paz. Podedes escoitalo premendo na imaxe: 

Día Escolar da Non Violencia e a Paz

Hoxe, 30 de xaneiro, celebramos o Día Escolar da Non Violencia e a Paz, unha data para promover valores tan importantes coma a tolerancia, o entendemento e o respecto. No cole celebrámolo con música, cantando "No niño novo do vento", unha canción ben axeitada para un día coma hoxe. Podedes escoitala neste vídeo, no que tamén se recollen algúns dos traballos realizados nas diferentes clases para conmemorar este día. 

O alumnado de 3º de Primaria realizou un interesante traballo sobre a paz ambiental, centrándose principalmente na contaminación dos océanos. Podedes escoitar o seu podcast e ler as súas investigacións premendo nas imaxes de abaixo. 

                             

O alumnado de 4º de Primaria tamén traballou estes días sobre a importancia da educación e da paz, vinculando dúas conmemoracións estreitamente ligadas: o Día da Educación e o Día Escolar da Non Violencia e a Paz. Non vos perdades o programa de radio que gravaron, podedes escoitalo neste vídeo:

 

Por último, se queredes ler máis sobre estes temas tan importantes, na biblio podes atopar un montón de libros e películas que tratan estes valores. Incluimos tamén unha magnífica reseña de Sofía de 1º da ESO sobre o libro "El niño con el pijama de rayas".

Día Internacional da Elimininación da Violencia contra as Mulleres

Para conmemorar este día, no CPI As Revoltas e en relación ao Proxecto Documental Integrado do Centro, "Os Océanos", decoramos os nosos corredores con seis faros galegos.  A Torre de Hércules, o Faro do Roncudo, o Faro de Punta Nariga, o Faro do Cabo Fisterra, o Faro do Cabo Touriñán e o Faro do Cabo Vilán iluminan palabras positivas e xunto aos mesmos, seis redes atrapan as palabras negativas.

Ademais, todas e todos xuntas e xuntos cantamos unha canción "Mar de Fondo", donde queremos expresar que sempre estaremos preparadas/os para axudar a esa amiga que o precise.