Mes da Ciencia en Galego

Ao longo deste novembro celebramos na biblioteca o Mes da Ciencia en Galego. Contámosvos nesta entrada as actividades que realizamos en colaboración co Departamento de Bioloxía.

PASATEMPOS CIENTÍFICOS

Para celebrar o Mes da Ciencia en Galego, propoñémosvos resolver os pasatempos científicos que o esqueleto Homero ten na entrada da biblio. Se os deixades no buzón, poderedes participar no sorteo de 3 cubos de rubik. Aínda non resolviches os pasatempos? Quédache esta semana para facelo! 

CONFERENCIA SOBRE AS ESPECIES INVASORAS

O pasado 7 de novembro tivo lugar na biblioteca unha charla sobre especies invasoras, impartida pola Asociación Galicia Ambiental. Aprendemos moito sobre especies coma a mimosa, a uña de gato, o mapache, o cangrexo americano e, sobre todo, unha das máis perigosas: a herba da pampa. A esta conferencia acudiron todos os cursos da ESO, que foron agasallados ademais cun libriño divulgativo dos Bolechas. 

EXPOSICIÓN BOTÁNICA

O alumnado de Proxecto Competencial de 2º ESO preparou unha exposición botánica de plantas e algas que recolleron na nosa contorna. Podedes vela na entrada da biblio. 

EXPOSICIÓN DE AVES DA NOSA RÍA

O alumnado de Proxecto Competencial de 1º ESO preparou unha exposición de aves que avistaron durante este outono. Moi recomendable para coñecermos os nosos veciños  da ría: o mazarico real, a cerceta común, a garzota común... e moitas outras! Podedes vela no corredor do laboratorio. 

EXPOSICIÓN DE LIBROS CIENTÍFICOS

Ao longo deste mes, a exposición da biblio estivo dedicada a libros de ciencia en galego. 

Experimentos na biblio - Ciencia en Galego

O galego é unha lingua que serve para todo: para conversar entre nós, para xogar, para ler e escribir incribles historias... e tamén, por suposto, para facer ciencia e divulgala. Así, ao longo de novembro celebramos nas bibliotecas o Mes da Ciencia en Galego e no CPI As Revoltas quixemos festexalo da mellor maneira: facendo ciencia na nosa lingua. 

En colaboración co Club de Ciencias, na última semana deste mes realizamos varios Experimentos na Biblio. O alumnado do Club de Ciencias ensinounos como facer sangue artificial ou como crear unha lámpada de lava; descubriunos o que era a masa non newtoniana; ensinounos a recoñecer as pegadas do xabaril e do raposo... E ata fixeron explotar un volcán na biblio!

Podedes ver nas fotos o ben que o pasamos e canto aprendemos!

 

Gael ensínanos a facer sangue artificial

Obradoiro de pegadas con Breixo

Aprendemos con Nerea o que é a masa non newtoniana

Facemos un volcán artificial con Laura e Carmiña

Facemos unha lámpada de lava con Nico, Manu e Paula