Xa chegou o Samaín

Mañá é o día do Samaín e esta semaniña no cole foi realmente intensa e terrorífica. Contámosvos deseguido as actividades que realizamos para celebrarmos a data máis horripilante do ano. 

CONTOS TERRORÍFICOS

Todos os cursos do centro, desde Infantil ata 4º ESO, crearon e gravaron na radio os seus contos de medo. Podes escoitalos premendo seguinte presentación, pero avisamos que non son aptos para persoas sensibles!! 

FESTIÑA DE SAMAÍN

O voluntariado da biblioteca de Secundaria preparou unha festa de Samaín para o alumnado de Infantil. Para comezar, interpretaron o conto Corre corre, Cabaciña e despois, festa rachada con xogos, baile e pintacaras. Pasámolo xenial! 

CONTACONTOS DE MEDO

Ao longo da semana, a profesora Raquel leulles contos de medo na biblio ao alumnado de Primaria. Esta mañá, os nenos e as nenas de 1º ESO contaron os seus relatos de Samaín en 3º e 4º de Primaria. 

A BIBLIO DO TERROR

A nosa biblio converteuse nunha auténtica casa do terror... Os andeis foron ocupados por pantasmas, bruxas, morcegos, cabazas... E tamén nos visitou o esqueleto Homero, que escapou do laboratorio para pasar estes días con Súper Pepiña. 

E MÁIS CONTOS DE MEDO!

Por último, se quedaches con ganas de máis contos de medo, podes levar algún dos que temos expostos na biblio. 

Día do Teatro

O pasado luns, 27 de marzo, celebrouse o Día Internacional do Teatro e un grupo de alumnas e alumnos de 4º ESO quixo festexalo preparando unha pequena peza teatral para os nenos e as nenas de Infantil e 1º ciclo de Primaria. A obra escollida foi "A vaca que puxo un ovo", adaptación do libro de Andy Cutbill. Despois, a rapazada de Infantil agasallou aos artistas cun bonito debuxo dos seus personaxes. Que ben o pasaron grandes e pequenos! :)

Certame de Teatro Lido

O grupo Os Viquingos do Pendón, formado polos alumnos Bruno A., Yeray, Bruno G. e Nicolás de 2º ESO, gañou o primeiro premio do XXI Concurso Escolar de Teatro Lido Xosé Manuel Eirís, organizado pola AC Telón e Aparte, no marco do Festival Internacional Outono de Teatro (FIOT) de Carballo. O grupo presentouse ao certame cun fragmento adaptado da obra Atraco no banco, de Manuel Núñez Singala. 

Pinchando na foto podedes escoitar a lectura dramatizada do texto que os Viquingos do Pendón gravaron nos estudos de Radio Voz de Carballo (emitido no programa Voces de Bergantiños o pasado martes, 15 de novembro). 

Os Viquingos do Pendón en Radio Voz

Os Viquingos do Pendón na Gala Final do certame

Ademais dos Viquingos do Pendón, participaron nesta edición do Certame de Teatro Lido outros tres grupos do CPI As Revoltas. Abaixo tedes o enlace ás fantásticas propostas que enviaron ao concurso. Moitos parabéns aos campións e tamén a todos os grupos participantes polo seu traballo! 😊

• Grupo CSI As Revoltas - A rateira 
• Grupo As Marías - Unha primavera para Aldara
• Grupo As Revoltiñas - Os vellos non deben de namorarse
• Grupo Os Viquingos do Pendón - Atraco no banco

20 anos do Prestige

O domingo 13 de novembro cúmprense 20 anos do primeiro mayday do petroleiro Prestige e do inicio da catástrofe ecolóxica que del derivou. Estes días, o noso alumnado está traballando sobre este terrible suceso que tinguiu de negro as nosas costas: o afundimento do buque, a marea negra, o chapapote, a solidariedade do voluntariado...

Os nenos e as nenas de 1º de Primaria elaboraron un emocionante relato sobre esta traxedia ecolóxica. Podedes escoitalo pinchando na seguinte imaxe:  

A traxedia do Prestige contada polos nenos e nenas de 1º de Primaria

O alumnado de 3º de Primaria estivo investigando sobre todo isto e os interesantes resultados das súas pescudas podedes lelos nestes traballos. Ademais, coa información recollida elaboraron un completo podcast que podedes escoitar pinchando na imaxe: 

A catástrofe do Prestige contada polo alumnado de 3º de Primaria

Os nenos e as nenas de 4º de Primaria tamén estiveron indagando sobre o Prestige e, logo de coñecer a historia, redactaron as súas noticias sobre o suceso, coma se fosen xornalistas daquela época. Por outra parte, tamén gravaron un programa na radio que podedes escoitar neste vídeo: 

O alumnado de 3º e 4º de ESO, despois de traballar sobre o tema nas clases, desprazouse o pasado xoves, 10 de novembro, a Santiago de Compostela, para asistir á obra teatral N.E.V.E.R.M.O.R.E. A caixa negra do Prestige, da prestixiosa compañía Chévere, un emocionante espectáculo que nos levou a mergullarnos nese episodio da nosa historia que cómpre non esquecer para que non se repita.