Ponte nas Ondas

O CPI As Revoltas participou o pasado 26 de marzo no maratón radiofónico realizado en 9 puntos de Galicia e Portugal para celebrar o 30º aniversario de Ponte nas Ondas. 

Acudimos, xunto con outros 13 centros escolares da Costa da Morte, á Casa da Cultura de Vimianzo, onde se desenvolveron sete horas de programación en directo. O noso alumnado participou cun programa moi especial sobre a música en Cabana. O guión foi escrito polo alumnado de 4º ESO e encargáronse da locución alumnos/as de 2º ESO. Ademais, Sofía de 1º ESO realizoulle unha entrevista ao seu avó, o músico Jesús Couto e, finalmente, Felipe e Sofía despediron o programa cunha pequena actuación musical. 

No vídeo podedes ver toda a emisión da Costa da Morte. O programa do CPI As Revoltas comeza a partir do minuto 46:00. 

Guadi Galego visita o CPI As Revoltas

Hoxe será unha data que xa nunca poderemos esquecer no CPI As Revoltas, hoxe recibimos a visita de Guadi Galego.

"Que ledicia terte no noso cole, que soño cumprido! Levamos anos esperando esta visita, parecíanos imposible, pero aquí estás". Así comezaba a presentación no noso cole desta grande artista.

Logo de facer un breve resumo da súa vida, todo o alumnado e profesorado tivemos a oportunidade de conversar con Guadi.

Premendo na seguinte imaxe poderedes ver un breve resumo de como preparamos no colexio este fantástico encontro.

Ademais aproveitamos a ocasión para facerlle unha entrevista na nosa radio "Ondas Revoltas". Podedes escoitala premendo na imaxe.

Día de Rosalía

Hoxe, 23 de febreiro, celebramos o Día de Rosalía, para homenaxear a nosa escritora máis emblemática. 

Ao longo desta semana, no cole realizamos diferentes actividades para traballar a figura de Rosalía de Castro. 

💙 Pódcast do alumnado de 3º de Primaria

O alumnado de 3º de Primaria cóntanos a biografía de Rosalía de Castro nun pódcast marabilloso que podedes escoitar premendo nas imaxes. 

💙 Novo episodio do programa Contos Revoltos

Rosalía de Castro destacou como poeta, pero sabías que tamén escribiu un conto en galego? O alumnado de 1º ESO interpretan o "Conto galego" de Rosalía no último episodio do seu programa Contos Revoltos. Podes escoitalo no seguinte vídeo: 

💙 Regueifando con Rosalía

A nota musical púxoa o alumnado de 2º ESO, cantándolle unha regueifa a Rosalía de Castro. Non perdas a súa fantástica actuación!

O Entroido está a chegar!

O Entroido está ás portas e no colexio xa se comeza a notar!

Peliqueiros, boteiros, felos, madamas e outros personaxes do Entroido galego tomaron a biblioteca. 

A festeira de Súper Pepiña xa puxo o seu traxe de Peter Pan. E para a próxima semana, a festa segue cos mandadiños e o desfile de Entroido o vindeiro venres!

                           

Torneo de xadrez

 Ao longo do mes de febreiro, estase a disputar na biblio un torneo de xadrez en homenaxe a don Paco, antigo profesor do cole que tanto nos ensinou sobre este xogo. 

O torneo, coordinado por Guille, desenvólvese durante o segundo recreo de secundaria e conta con case 30 participantes. 

Día Mundial da Radio

O 13 de febreiro celébrase o Día Mundial da Radio e o alumnado de 3º e 4º de Primaria colaborou coa asociación PONTE... NAS ONDAS enviando os seus programas de radio. A temática estivo centrada na radio e no cambio climático. 

Preme na imaxe para acceder aos programas dos dous cursos!

2025 - Ano Castelao

Este 2025 celebramos o Ano Castelao, no 75º aniversario do pasamento do emblemático escritor, debuxante e político. Ao longo do curso desenvolveremos diferentes actividades para homenaxear a figura de Castelao. 

Por agora, podes ver a exposición que colocamos na entrada da biblioteca: 

Tamén podes escoitar o episodio 5 do podcast Contos Revoltos. Nel, o alumnado de 1º e 4º ESO céntranse na faceta contista de Castelao e cóntannos algún dos seus relatos de Cousas.